Музейныя вандроўкі №1 (спампаваць)

Выпуск першага мультымедыйнага адукацыйна-забаўляльнага часопіса «Музейныя вандроўкі» для дзяцей і падлеткаў арганізавалі Нацыянальны гістарычны музей (НГМ) Беларусі і мабільны аператар velcom.

Прэзентацыя першага нумара адбылася 20 кастрычніка ў Мінску ў межах адкрыцця сумеснага праекта «Музей дзецям з velcom». З «Музейнымі вандроўкамі» можна азнаёміцца на сайце НГМ або спампаваць яго — версія адаптаваная для выкарыстання на мабільных прыладах.

Часопіс заснаваны на ўласных музейных калекцыях, паведаміла журналістам куратар праекта, мастацтвазнаўца, навуковы супрацоўнік аддзела музейных камунікацый НГМ Дар'я Астрагаловая. «У XXI стагоддзі музей павінен выходзіць на новыя ўзроўні камунікацыі з наведвальнікамі, у тым ліку з дапамогай лічбавых тэхналогій, — адзначыла яна. — Нягледзячы на тое што часопіс арыентаваны на дзяцей малодшага і сярэдняга ўзросту, ён будзе таксама цікавы і іх бацькам — у нас атрымаўся сямейны прадукт».

Першы нумар, які выйшаў на 26 старонках, цалкам прысвечаны эпосе Сярэднявечча, тэме рыцарства і шляхецтва ў Беларусі. Асаблівасцю часопіса стала тое, што некаторыя тэксты суправаджаюцца інтэрактыўнымі матэрыяламі. Так, напрыклад, у артыкуле «Хто такія рыцары?» размешчаная рэпрадукцыя палатна XVI стагоддзя «Бітва пад Оршай» невядомага аўтара. Яго дэталёвы прагляд адкрывае аўдыяролік з аднайменнай песняй беларускага калектыву сярэднявечнай музыкі «Стары Ольса».

Другі нумар «Музейных вандровак» плануецца выпусціць 1 снежня.

У межах сумеснага праекта Нацыянальны гістарычны музей і velcom стварылі новую інтэрактыўную музейна-пазнавальную прастору, у якой будуць праходзіць тэарэтычныя і практычныя заняткі, прысвечаныя гісторыі, традыцыям і культуры Беларусі. Акрамя таго, мабільны аператар дапамог музею мадэрнізаваць тэматычную дзіцячую залу, якая мадэлюе працэс археалагічных раскопак.

БелаПАН, праз nn.by